Masharti ya wauzaji

Imesasishwa mwisho tarehe 29 Septemba 2026

Nani anaweza kuuza

Unaweza kuuza kwenye InstaSoko ukiwa na biashara halisi katika mji tunaouhudumia, ukiwa na umri wa miaka 18 au zaidi, na ukithibitisha nambari yako ya simu. Mtu mmoja au biashara moja ina duka moja. Tunakagua kila ombi kabla duka halijafunguliwa, na tunaweza kuomba kitambulisho, usajili wa biashara au, kwa duka la dawa, leseni yake.

Duka lako na bidhaa zako

Wewe unawajibika kwa unachoweka: majina, picha, bei na idadi lazima viwe vya kweli, na bidhaa lazima ziwe zako na halali mahali unapoziuza. Bei zinajumuisha kila kitu mnunuzi anachokulipa; usafirishaji unaongezwa na InstaSoko. Bidhaa za maduka mapya zinakaguliwa kabla wanunuzi hawajaziona.

Visivyoweza kuuzwa

Dawa za kulevya, dawa zinazohitaji agizo la daktari, silaha na risasi, vilipuzi, bidhaa feki, vitu vilivyoibiwa, bidhaa za wanyamapori kama pembe za ndovu au kakakuona, dhahabu ghafi, coltan na madini mengine bila leseni, maudhui ya watu wazima, kamari na mipango ya pesa ya udanganyifu. Pombe na tumbaku vinauzwa kwa watu wazima tu na vinaonyeshwa 18+. Duka likiuza kitu kilichokatazwa, tunalifunga mara moja na pesa ya mpango hairudishwi.

Mipango na malipo

Unalipia mpango kabla duka lako halijakaguliwa: mwezi mmoja, mitatu au kumi na miwili, kwa bei inayoonyeshwa kwa mji wako na aina ya biashara yako. Unalipa kwa pesa ya simu kwenye nambari inayoonyeshwa na unatupa msimbo wa muamala. Msimbo wa punguzo unaweza kushusha bei. Tukikuomba urekebishe kitu, malipo yako yanahifadhiwa siku 30. Duka lako lisipokubaliwa kwa sababu nyingine isiyo bidhaa zilizokatazwa, tunakurudishia pesa. Mpango unaendelea tu ukilipa tena; tunakukumbusha siku 7 na siku 1 kabla ya mwisho, na duka lako linabaki wazi siku 7 zaidi kabla ya kusitishwa.

Oda na usafirishaji

Mnunuzi akiagiza, unathibitisha oda haraka, unaiandaa na kuikabidhi kwa msafirishaji wetu, au kwa mnunuzi akija kuichukua. Kataa oda pale tu usipoweza kuitimiza, na useme kwa nini. Magari na mashine haviagizwi: wanunuzi wanakutumia swali nawe unashughulika nao moja kwa moja.

Malipo kwako na kamisheni

Wanunuzi wanalipa InstaSoko. Kwa kila oda iliyofikishwa tunabaki na kamisheni kwenye bei ya bidhaa (kiwango cha biashara yako kinaonyeshwa kabla hujalipa) na kuongeza kinachobaki kwenye salio lako. Tunatuma salio lako kwenye pesa yako ya simu mara kwa mara, na unaona kila oda na kila malipo kwenye dashibodi yako. Mnunuzi akikulipa taslimu dukani, kamisheni inakatwa kwenye mapato yako yajayo.

Taarifa za wanunuzi

Unaona jina, simu na mahali pa kufikisha oda ya mnunuzi ili uitimize. Zitumie kwa oda hiyo tu. Usiwatumie wanunuzi ujumbe kwa jambo lingine, na usishiriki taarifa zao kamwe.

Kusitishwa na kufungwa

Tunaweza kusitisha au kufunga duka linalovunja masharti haya, linalowadanganya wanunuzi, lisilotimiza oda zake au linalopata malalamiko ya mara kwa mara. Unaweza kusitisha duka lako kwa muda, au kutuomba tulifunge; tunakulipa kwanza tunachokudai.

Mabadiliko

Tunaweza kubadilisha masharti haya au bei za mipango. Tunakwambia kwenye programu kabla mabadiliko hayajakuhusu, na mpango uliokwisha kuulipia unabaki na bei yake hadi mwisho wake.